РУССКАЯ ПРАВОСЛАВНАЯ ЦЕРКОВЬ МОСКОВСКИЙ ПАТРИАРХАТ

Библиотека

Акафист святым Женам-мироносицам

 

В Неделю третию по Пасце

Святых жен мироносиц

 

Тропарь, глас 2:

Мироносицам женам при гробе представ, ангел вопияше:/ мира мертвым суть прилична/ Христос же истления явися чуждь./ Но возопийте: воскресе Господь,/ подаяй мирови велию милость.

Кондак, глас 2:

Радоватися мироносицам повелел еси,/ плач праматере Евы утолил еси воскресением Твоим, Христе Боже,/ апостолом же Твоим проповедати повелел еси:/ Спас воскресе от гроба.

 

Акафист святым женам мироносицам

 

Кондак 1

Брани угашает и мир устрояет Державное Слово молитвами вашими, жены святыя. Ныне же благодарений наших приносим вам малая сия словеса:

Радуйтеся, мироносицы преславныя, Воскресения Христова провозвестницы.

Икос 1

Ангел у гроба, яко молния, во тьме сияя, мироносиц сретает грядущих, возвещая им таковая:

Радуйтеся, яко Господь Сил воскресе; радуйтеся, яко Царь Славы воста.

Радуйтеся, яко ветхая скорбь упразднися; радуйтеся, яко новая радость возсия.

Радуйтеся и слезы печали отрите; радуйтеся и, шедше, апостолов возвеселите.

Радуйтеся, мироносицы преславныя, Воскресения Христова провозвестницы.

Кондак 2

Утру свитающу, мироносицы ко гробу идоша, ароматы носяще нас ради Распятому и Погребенному, Емуже вся силы Небесныя воспевают: Аллилуиа.

Икос 2

Мироносицы, любовию движимы, Погребеннаго помазати тщатся, мы же безстрашие святых жен похваляем словесы таковыми:

Радуйтеся, в ризы спасения облеченныя; радуйтеся, кротостию и незлобием украшенныя.

Радуйтеся, венцы смирения носящия; радуйтеся, бисером добродетелей испещренныя.

Радуйтеся, голубицы ковчега спасительнаго; радуйтеся, благовестницы лета Господня приятнаго.

Радуйтеся, мироносицы преславныя, Воскресения Христова провозвестницы.

Кондак 3

На камени гробнем ангел седя, воскресение извествует, мы же, на камени веры утвердившеся, вопием: Аллилуиа.

Икос 3

Тецыте ко апостолом, о жены, тецыте и торжество им проповедите, глаголет светообразный. Сего ради услышите от нас сицевая:

Радуйтеся, возлюбленныя Божия ученицы; радуйтеся, трудов Господних соработницы.

Радуйтеся, о Господе воскресшем веселящияся; радуйтеся, о Христе воставшем торжествующия.

Радуйтеся, истину неложно уверяющия; радуйтеся, правду благонадежно держащия.

Радуйтеся, мироносицы преславныя, Воскресения Христова провозвестницы.

Кондак 4

Магдалино, покаяния дщи и Воскресения первая свидетельница! Умоли Небеснаго Вертоградаря, Христа, от мучащих нас страстей избавитися и чистым сердцем взывати Ему: Аллилуиа.  

Икос 4

Приидите, жены боголепныя, потщитеся гроб тощь видети, яко да Небеснаго Жениха обрящете воскресша и услышите песнословия сия:

Радуйтеся, Христа со елеем сретающия; радуйтеся, светильники веры возжигающия.

Радуйтеся, уныние от нас отлагающия; радуйтеся, упованием на Бога нас укрепляющия.

Радуйтеся, бесовских страхований отгонительницы; радуйтеся, ангельския радости насадительницы.

Радуйтеся, мироносицы преславныя, Воскресения Христова провозвестницы.

Кондак 5

Саломие, сынов громовых мати! Красны песни воспой и победное Воскресение возвеличи: Аллилуиа.

Икос 5

Бог Сый мира, Отец щедрот, Воскресение Сына Своего являет благодерзновенным женам и нас подвизает ублажати сих словесы таковыми:

Радуйтеся, жены равноапостольныя; радуйтеся, свет Евангелия миру проповедавшия.

Радуйтеся, глаголы вечныя разумевшия; радуйтеся, в заповедех святых любомудрствовавшия.

Радуйтеся, смирения образ показующия; радуйтеся, кротости силу являющия.  

Радуйтеся, мироносицы честныя, Воскресения Христова проповедницы славныя.

Кондак 6

Марие, благую часть избравшая! Боговещанному глаголу внемли, яко Господь славы воста, и воспевай в веселии: Аллилуиа.

Икос 6

О, апостоли Христовы, самовидцы Слова! Веруйте проповеданию мироносиц, аще и неудобь вместимая глаголют, но истину непреложно благовествуют, и рцыте им:

Радуйтеся, Христа дерзновенно исповедавшия; радуйтеся, ложь диавольскую обличившия.

Радуйтеся, безстрашныя Божия воительницы;  радуйтеся, темных сил сокрушительницы.

Радуйтеся наставницы смиренномудрия; радуйтеся, подательницы долготерпения.

Радуйтеся, мироносицы преславныя, Воскресения Христова провозвестницы.

Кондак 7

Марфо многорачительная и трудолюбивая! Зри Восток богосветлаго Солнца и виждь, яко вся тварь обновляется и, блистающися, поет: Аллилуиа.

Икос 7

Богопроповедники апостолы ублажим, Владычнее Царство пришедшее благовестивших, и жен премудрых купно с ними возвеличим:

Радуйтеся, трудящимся во благовестии укрепление; радуйтеся, милость творящим вспоможение.

Радуйтеся, приступающих к вам надеяние; радуйтеся, припадающих к вам упование.

Радуйтеся, христиан заступление; радуйтеся, безбожных вразумление.

Радуйтеся, мироносицы преславныя, Воскресения Христова провозвестницы.

Кондак 8

Иоанно богомудрая и благосердая! Хвалу принеси Содетелю Богу и смерти силу Разрушившему победную песнь воспой: Аллилуиа.

Икос 8

Молитву усердную приемлет Благоуветливый Владыка Христос от Своих рабов, совершающих честную память мироносиц и восклицающих:

Радуйтеся, верным чадом Божиим помогающия; радуйтеся, лукавых рабов обличающия.

Радуйтеся, гордыню властителей смирившия; радуйтеся, гнев мучителей угасившия.

Радуйтеся, скудости нашея восполнение; радуйтеся, немощи нашея врачевание.

Радуйтеся, мироносицы преславныя, Воскресения Христова провозвестницы.

Кондак 9

Марие боголюбивая и Сусанно ревностная, небоязненно гроба достигшия! Христу, нощь греха отгнавшему и смерти державу упразднившему, воспойте: Аллилуиа.

Икос 9

Небо, веселися, земле, ликуй с мироносицами вкупе. Спас воскресе, Егоже непрестанно хваляще, равноапостольным женам слагаем песнь сицевую:

Радуйтеся, на одре лежащих воставление; радуйтеся, здравых верою укрепление.

Радуйтеся, младенцев надежное защищение; радуйтеся, отроков учащихся умудрение.

Радуйтеся, мужей благочестивых доблесте; радуйтеся, жен непорочных чистото.

Радуйтеся, мироносицы преславныя, Воскресения Христова провозвестницы.

Кондак 10

Жены, печалию омраченныя, ко гробу идуще, не ведяху, яко Христу Солнцу Правды возсиявшему вскоре поклонятся и Богу Живому с радостию воспоют: Аллилуиа.

Икос 10

Пасху празднующе вечную, мирен дух сподобимся стяжати и мироносиц день немолчными песньми почтим:

Радуйтеся, Христови усердно послужившия; радуйтеся, апостолом во благовестии подражавшия.

Радуйтеся, слезы умиления подающия; радуйтеся, сердца наша в горняя возводящия.

Радуйтеся, во благочестии и вере наставляющия; радуйтеся, чистоте и целомудрию научающия.

Радуйтеся, мироносицы преславныя, Воскресения Христова провозвестницы.

Кондак 11

О, мироносицы честныя! Вскую Жизнодавцу миро приносите? Жена блудница предвари вас своим помазанием, но познайте Сего яко Бога воскресша и воспойте хвалебную песнь: Аллилуия.

Икос 11

Царю мира и Спасу нашему апостолов лик и мироносицы жены присно славу воздают и Дивному во святых Своих Богу хвалебную песнь приносят. Мы же им воспеваем:

Радуйтеся, смирением сердца исполняющия; радуйтеся, покаяния двери отверзающия.

Радуйтеся, от клеветы человеческия избавляющия; радуйтеся, лукавыя словеса обличающия.

Радуйтеся, святою верою снабдевающия; радуйтеся, крепкою надеждою восперяющия.

Радуйтеся, мироносицы преславныя, Воскресения Христова провозвестницы.

Кондак 12

Мироносицы жены плач на радость преложиша, с нимиже и вся вселенная ликует: воскреснут мертвии, и востанут иже во гробех, и земнороднии воскликнут: Аллилуиа.

Икос 12

Прославим, вернии, собор жен честных, во благовестии Воскресения Христова потрудившихся, и, ликующе. воспоим:

Радуйтеся, света Христова причастницы; радуйтеся, жизни вечныя наследницы.

Радуйтеся, в тесноте ослабу подающия; радуйтеся, в тяготах облегчение приносящия.

Радуйтеся, души от пути погибельнаго отводящия; радуйтеся, нас ко спасению наставляющия.

Радуйтеся, мироносицы преславныя, Воскресения Христова провозвестницы.

Кондак 13

О, мироносицы всечестныя, Христа верныя ученицы! Приимите наша смиренныя похвалы и окамененная сердца наша миром молитв ваших умягчите, да Воскресшему Спасу с вами непрестанно вопием: Аллилуиа.

Сей кондак читаеся трижды. Таже икос 1-й и кондак 1-й.

 

Молитва

О, жены благословенныя, мироносицы святыя, мир Христов в сердцах ваших носящия! Почитаем верность вашу, яко у Креста Господня небоязненно стоясте. Ублажаем и яже по Бозе ревность вашу, еюже движимы, ко гробу текосте миром помазати погребеннаго Владыку. Прославляем чистую любовь, еяже ради воскресший Господь первее вам явися и радостию сердца ваша исполни. Почитаем и апостольския труды, имиже Христа воскресшаго дерзновенно исповедасте пред народы, владыки и цари.

Ныне же к вам с верою и любовию прибегаем и усердно просим: умолите Всещедраго Жизнодавца силою Креста Его нам укрепитися, в подвизех любве и самоотвержения утвердитися, душевным же и телесным болезнем нашим исцелитися. Да возсияет и нам благодать Воскресшего Христа, Бога нашего, и да внидем в уготованный Им Чертог Небесныя славы, идеже вкупе с вами сподобимся прославляти Троицу Единосущную и Нераздельную во веки веков. Аминь.

 

 

В начало страницы | Библиотека | Храм святых Жен-мироносиц, Гусенки

Сайт дубненско-талдомского благочиния РУССКАЯ ПРАВОСЛАВНАЯ ЦЕРКОВЬ МОСКОВСКИЙ ПАТРИАРХАТ
Дубненско-Талдомское благочиние, официальный сайт
Новости и объявления | Храмы | Расписание | История благочиния | Газета "Православная встреча"
Воскресные школы | Наука и религия | Ссылки | Контакты | Поиск | Карта сайта
© DUBNA-BLAGO.RU 2009-2015